حكايات جيجى

جابتك كده... علشان واحد عرفتيه النهارده وامبارح...  كان فرصه بالنسبالي راضي بيا زي ما انا.. وراضى  ببنتي وراضي بوضعي عايزني وشاريني رغم  الكلام اللي انتى روحتى قلتيهوله عليا سال وما رضاش ياخد الكلمه وخلاص وسال واستفسر وبرده جه يعني ما فيش فرصه اكتر من كده تفتكري انا يا ملك اختاروا عليكى بعد اللي انتى عملتيه ده انتى لو مكاني كنتى هتختاريه...  تفتكري انا كمان اعملها...
ملك بندم...  اسفه انا... انا مش عارفه انا قلت كده ازاي والله كانت.... كانت لحظه زعل انا كنت... كنت  عايزه بس ابعدو 
صباح... ده اد ابوكي ومطلق ما ينفعكش.. انتى لسه بتدرسي بكره وبعده تحبي موعيد في الجامعه تحبى واحد زميلك في الجامعه الحياه قدامك.... هو مش فرصه ليكي عشان تعملي اللي عملتيه فيا ده عشانو... حتى لو فرصه ما لكيش الحق بس هو مش فرصه بالنسبالك نهائي 

ملك... حقك عليا ما تزعليش مني انتى عندك حق انا كنت انانيه قوي بصي يا ماما روحي اتجوزيه انا... انامش هزعل بس سامحيني..
صباح..  انا مش عايزه اتجوزه يا اختي انا لو كنت هوافق عليه كان اول شط هيبقى عشان انتى بتتفاهمي معاه ومش هيبقى حد غريب ووحش بالنسبالك علشان كان هيرضى بيكي.. هيرضى اخدك معايا ويعاملك هو كبنته انا طالما انتى مش عايزه.... يبقى خلاص انا مش بس لو حطيتك قصاد كفة الجواز كفتك هتفوز... لا دا انا لو حطيتك قصاد كفه عمري... كفتك تفوز.. انتى حته من قلبي ما سبكيش عشان اي حاجه في الدنيا... مش بس عشان جوازه....

ملك...  يعني هتسيبيه علشاني...
صباح...... انا اسيب الدنيا عشانك لو عايزه عيني اديهالك وبكل رضا... انتى بنتي.. لو كنتى قولتيلي من اول مره.. ما كانش كل البعد ده حصل... اسمعى يا ملك انا ضيعت عمري اللي فات كله عليكى... وما عنديش اي مشكله اضيع عمري اللي جاي عليكى.... بس اطلع بيكي من الدنيا.. ما ضيعش عليكى عمر فات وعمر جاي.. وتسيبيني عشان حي الله واحد ظهر في حياتك... انا أبديكي على الدنيا بحالها حتى عليا هديكى عمري مش هستخسروا فيكى..
ملك باست ايدها وقالت...
يسلم عمرك يا ست الكل..  والنبى يا ماما ما تزعليش مني والله ما فيش حاجه تستاهل انك تزعلي مني لو كانت ايه
صباح.. انا اعرف ازعل منك كان يبقى ده حالك تيجي عليا وانتى عارفه اني هسامحك وهصالحك واراضيك... 

ملك..  حقك عليا...
صباح...   انتى كمان حقك عليا انا ما فهمتكيش شوفي بقى امك هتعمل  ايه
وطلعت الفون وقالت..  ايوه يا استاذ اياد وعليكم السلام بص يا استاذ  ركز معايا في الكلمتين دول... انا عايزاك تعتبر الجيه اللي جيتها من شويه دي حضرتك ما جيتهاش مش بس كده اعتبر نفسك البيت ده ما جيتش فيه.. ولا اديت حد دروس نهائي ولا شفت بنتي ولا شوفتنى... وخلاص انا هشوف مدرس تانى لملك... وشكرا 
وقفلت منو وقالت.. تعالى ننام يخلص اليوم ده ومعاه كل اللى فات ونبدا من جديد.. 
ونامو سوا..  تانى يوم الصبح كانت ملك في المدرسه.. وصباح قاعده  مع رقيه اختها فى  البيت اللى بتقول..

يعني ضيعتى كل ده يا بنتي... دي كانت فرصه عمرك.. 
صباح.. ملك حته مني ومالهاش غيري وتستاهل ان انا اضيع اي حاجه علشانها.. دى العمر كله لوضع عليها قليل دي بنوتي وحبيبتي وصاحبتي وكل حاجه ليا في الدنيا 
رقيه.. بس بنتك انانيه قوى...
صباح.. حتى لو  انانيه مش هسيبها لدماغها توديها وتجيبها... لو انانيه المها تحت جناحي واعدل منها..
رقيه.... ايوه بس الراجل كان شاري ما كانش عنده مشكله في اي حاجه واخيرا الحظ هيضحكلك بعد السنين دي يا بنت الفقريه...

صباح.. لا ما ظنش مستحيل الحظ يضحكلي وبنتى زعلانه مني.. مش هفرح ابدا وفي ما بيني وما بين بنتى شرخ.. حظي في بنتي.... بنتي هي قوتي احط فيها عمرى كلو.. انا ضيعت عمرى عليها.. لو خسرتها يبقى عمرى راح على الفاضى.. 
رقيه..  بس بكره وبعده البنت تتجوز وتفضلي لوحدك في البيت زى قرد قطع... واحتمال جوزها يقولها ما تروحيش عند امك اصلا... تفتكري هي لو جوزها قالها ما تروحيش عند امك اصلا هتسيب جوزها وبيتها عشانك اكيد لا هتقول بيتي وجوزي اولى... وهتفضل مع بيتها وجوزها وهتسيبك... انا من رايي ان انتى تتجوزيه وتقعدي معاه والبنت  ما هي قاعده معاكى  يومين وهترضى.. لانك مش عشان سبتى ده عشانها النهارده هي هتسب عشانك واحد بكره... عيشى لنفسك لو جوزها خيرها ما بينو وما بينك هتختارو هو... خصوصي لو كان عندها ولاد... سعيتها هيبقى انتى راحت عليكى... وما فيش عريس هيتقدم لك لانك هتكوني عجزتى وكلكعتى هتوديكي دار مسنين ساعتها بجد هتحسى ان عمرك راح على الفاضي مش دلوقتي.. 
صباح... لا انا بدعى ربنا يعوضنى.. انا بعد كل البهدله اللي شفتها دي ربنا ان شاء الله مش هيخليني ادى بنتي لراجل يقولها انا ولا امك.... لا ربنا ان شاء الله هيقف معايا ويديها لراجل كويس يعتبرني امه التانيه...
رقيه...  ههه عمرو الحمايه ما بتكون ام الحماه  تفضل حماه.. والام.. ام... وانتى هتفضلى لوحدك.. دلوقت مش هتحسى بس بعدين لما انتى تكبرى..  وبعد ما البنت تكبر وتتشغل بحياتها.. وتسيبك هتندمي ندم عمرك.. وساعتها الندم مش هيفيدك.. وهتقولى ياريت اللى جرى ما كان.. وبكره تقولى اختى رقيه قالت... 
صباح.. لا  انا شايفه انو من المستحيل اندم طالما توكلت على الله.. 
رقيه..  ونعم بالله بس المفروض تفكرى فى روحك...
صباح... لا بنتي اولى مش هسيبها علشان اي حاجه في الدنيا.. انا افضل مع بنتي واكبرها واراعيها لحد ما تكبر وادعي ليل نهار ان ربنا يرزقها الراجل الصالح اللي يرزقها بري مش ينهاها عني...