حصرى بقلم جيجى
المحتويات
هنام هنا
طارق... انا لو في حاجه وحيده عدله في حياتي فهي انتى والله العظيم انتى رزقى من ربنا
ملك... انا رزق
طارق... اه ما الرزق مش شرط يكون فلوس ممكن في الصحه فى الناس اللى بتسندك فى المحن الحمد لله ان انتى موجوده معايا انتى رزق كبير
ملك ببتسامه... صح بعدين البيوت مش حيطان وسقف البيوت بالناس اللي عايشين فيها هما اللي بيعملوا الحياه الناس هي اللي بتعمل البيوت مش البيوت اللي عملت الناس
طارق.... هههه ما الناس ما بقتش عارفه تعمل فلوس وبيوت والفلوس مش عارفه تفضل مع الناس وتوهه ودوامه تبلع بلع
ملك... هههه لا متقولش كدا هتتعدل سيبك انت مش ناوى تقولى ماما كانت بتقوللك ايه اقبل ما انا اجى
طارق.... اممم مش مهم بقى كانت بتقول اللي بتقوله المهم انك معايا وانا معاكى
ملك....كدا ماشي تصبح على خير
طارق... وانتى من اهله...
وتاني يوم طارق كان راح شغله وجيه واحد صاحبه حط ظرف قدامه وقال...
صباح الخير يا طروقه
طارق بص للظرف بستغراب وقال....
ايه ده يا شاكر
شاكر قال ببتسامه.... ده يا سيدي كده مبلغ محترم احنا قعدنا مع بعض شباب الشركه كلهم يعني اول ما عرفنا باللي حصل ولمينا سوا المبلغ دا هيساعدك شويه ان شاء الله
طارق بغضب... اى اللى بتقولو دا انتو لميتولى تبرعات مش عايز حاجه رجعو من مكان ما جبتو
شاكر.... ايه اللي انت بتقوله ده تبرعات ايه لا ما فيش حاجه من دي احنا بس كل اللي حصل ان احنا عرفنا بازمتك ف حبينا نساعدك بس ف لمينا مع بعضنا كده وحطناهم فى الظرف وبعدين يا سيدي اعتبرها سلف لو مش عايز تعتبرها خدمه مننا... عادى... اعتبرها سلف ولما الحاله تتحسن ان شاء الله وربنا يكرم ابقى رجعلنا الفلوس.. لو تحب انا ممكن افردلك هنا كل واحد دفع قد ايه
طارق... بقولك ايه لا سلف ولا تلف انت هتاخد الفلوس دي وترجعها لاصحابها وانا على قد الحافك مد رجليك انا هظبط سكني على قد فلوسي وشكرا
شاكر.... انت لى كدا دماغك ناشفه ده كلنا حابين ان احنا نساعدك صحابك بيحبوك ومش عايزين يشوفوك مزنوق وهم قاعدين ليه بتشوفها كده يعنى مثلا لو بيتى انا اللى وقع انت مكنتش هتساعدنى يعنى مكنتش هتدينى فلوس كنت هتسيبنى سواء انا او اى حد من صحابنا دول هما حتى بعتوها معايا عشان متتحرجش منهم
طارق... تؤ بجد شكرا على الحركه اللطيفه جدا دي هى حركه جميله منكم بجد وشكرا من قلبي انكم فكرتوا فيا اصلا وان انتو حبيتوا تساعدوني بس انا مش هقدر اخدهم ابدا انا بجد مش محتاج يعني الحمد لله مستوره انا هدبر نفسي
شاكر....تدبر نفسك منين هو انا غريب يا طارق ما انا عارف البير وغطاه
طارق... مستوره الحمد لله انت ما تقلقش عليا بس انت رجع الفلوس دى دلوقت وادى كل واحد حاجته تمام وبجد بلغهم الشكر قولهم طارق بيقول لكم شكرا بجد
شاكر... انا كنت متاكد والله من وانا بجيبهم ان انت مش هتاخدهم راس الجزمه دى وانا عارفها بني ادم براس كلبه
واخد الفلوس ومشى وطارق بقى يكمل شغلو.... اما ملك راحت لنعمه المطبخ وقالت...
احم محتاجه حاجه أساعدك فيها يعنى انظف معاكي البيت اعمل معاكي اى حاجه
نعمه شدتها من ايدها طلعتها بره وهى بتقول..
تعالي تعالي انا عايزاكى فى حاجه اهم عايزين ندردش شويه سوا انتى حتى وحشانى قوى...
ملك.. خير
نعمه قعدت على الكنبه وقعدت ملك وقالت....
كل خير يا حبيبتي هو انتى يعنى يجى من وراكى الا كل الخير دا انتى عسل كده تتحطى على الجرح يطيب
ملك بستغراب... مين احنا.. احم اوكي هو بجد ميرسي يعني على الاستضافه الجميله دي
نعمه... انتى بتقوليه ده طب وانتو لو ما لقيتوناش احنا هتلاقوا مين ده انا والنبي اول ما رجع حسام من بره وقالي ان انتم اللي كنتم على الباب هزقتوا اه والله قولتلو دا اخوك وقلتلو يروح يصالحو..
ملك.. امم ميرسي
نعمه... قولي لي يا اختي الانتيكا اللي لقيتوها تحت البيت دي اى حكايتها
ملك... اه عروسه دهب قطعه اثار الولد وليد لقاها تحت الانقاض طارق طلعها بس بيقول انو هيسلمها للبوليس يعني لانه هي مش بتاعتنا وكده
نعمه... هو ايه اللي تسلموها دى يا اختى.. الحاجه دي حقكم مش انتم مشتريين الارض ولقيتوها في ارضكم
ملك.. صح..
نعمه.. خلاص تبقى حقكم بعدين يا اختي بيني وبينك ما تزعليش مني يعني انتو محتاجينها عشانك انتى وعيالك شوفى متبهدلين ازاى في البيوت من بيت لبيت امبارح عند امك والنهارده عندنا وبايته انت وجوزك واولادك ومكعفسين في اوضه واحده ويعالم هتفضلوا على الحال ده لحد امتى فتره كبيره لحد لما تبقوا تجمعوا فلوس وتبنوا بيت تاني... وليه كل دا ما تقوموا تبيعوها... رزق وجايلكم من ربنا ترفضوه ليه... اقولك انتو تقومو تبعوها وتجيبوا لكم بيها بيت بحقها.. اه بيت محترم كده تقعدو فيه انتى واولادك وجوزك وترفهى كده عن نفسك.. تجيبيلك حتتين سيغه تلبسيلك فستان حلو.. اهو حتى تسكتي امك اللي عماله كل يوم تنحل فى وبر جوزك وتقوليلها انه معيشك عيشه مرتاحه
ملك بحزن.... ما انا بفكر فى كل اللي انتى بتقوليه ده ونفسي فيه بس هو طارق رافض الموضوع دا نهائى
نعمه.... رافض اى وقابل ايه انتى تفضلي تزني عليه لحد ما يوافق دا على راي المثل الزن ع الودان امر من السحر انتى تقدري تقنعيه كل واحده معاها مفتاح مخ جوزها تفتح وتدخل وتحط اللي هي عايزاه في المخ وتطلع تانى بالك انتى انا لو عايزه حسام يعمل اي حاجه في الدنيا هخليه يعملها على طول كل ست تقدر تقنع جوزها ايوه امال ايه
ملك...انتى عندك حق بس طارق غير يعني مش بسهوله يتقنع معاكي فاهمه
نعمه... اى راجل يتقنع بسهوله الراجل دا زي العيل الصغير ابياااض اللي انتى عايزاه تحطيه فيه بيجى بكلمتين
ملك... كلمتين دا انا باخد ٣ سنين احايل طارق علشان يعمل الحاجه اللي انا عايزاها ومقتنعه بيها وما بيعبرنيش
نعمه... يا بت اتعلمي ازاي تكسبي مخ وقلب جوزك الراجل مخه في ودانه كلمتين يجيبوه وكلمتين يودوه
ملك... يعني انت برايك احاول تانى
نعمه.. تانى وعاشر لحد ما يرضى
ملك... خلاص انا هحاول معاه لما يجي
نعمه.... لازما ولابد تحاولي معاه لما يجي ومش تحاولي كده كلمه يا صابت يا خابت يا اثنين عور لا لازمن تصممي على رايك كده وتقوليله كدا بالنص انا اتبهدلت انا امي كل يومين تقولي جوزك جوزك وامي كل يومين تقوللي بيتك بيتك ومش عارفه ايه وعايزه تطلقنى منك وعايزه تاخدني منك ده عشان تحافظ عليا وتحافظ على بيتنا تعالي من الحته دى امسكيه من دراعه اللي بيوجعه
ملك.... ايه الكلام ده لا طبعا انا ما اقدرش اضغط على طارق واجيلو من الناحيه اللي بتوجعه... وبعدين انتى مين قالك ان ماما عايزه تطلقنى من طارق اصلا ايه اللى بتقوليه دا هى بس مش بتحبو انما مش لدرجة تطلقنى منو يعنى
نعمه.... لا عايزه تطلقكم هو طارق قال لجوزي انها قالتله انه لو عنده دم يطلقك وان هو مش قادر يعمللك بيت ولا مكان ولا فلوس ولا حاجه خالص يا قلبي وانو لو بيحبك يطلقك
ملك... بس انا ما اقدرش ازيدها عليه يبقى الدنيا جايه عليه من هنا وانا اجي عليه من هنا ما اقدرش اشوفو بيتضغط وسطنا لا طبعا مستحيل اعمل كدا انا
نعمه بهتمام.... امال انتى هتقنعيه ازاي يعنى
متابعة القراءة
