الحبل السرى بقلم جيجى

قدام باب اوضه كبيره في شقه فخمه كان واقف شاب فى الاربعين رايح جايه قدام الاوضه والتوتر باين على ملامحه بعد شويه طلعت ست كبيره من الاوضه بملامح عابسه قال بلهفه. 
ها ايه يا ماما
امنه..... المره دى ولدين بس زي العاده نزل منها زي الفل اول ما قصو الحبل السري مات
بدر... اوف انا زهقت بقى كل مره يموت اول ما يقطعو الحبل السري
امنه... انت لو تبعتنى كان زمان معك عيل واثنين وثلاثه وعشره بس نقول اى
بدر... بالله عليكى مش وقته دلوقت
طلعت صباح مرات اخوه وقالت... خلاص يا حماتي الله يعينه على اللي هو فيه ولا عيل واحد عاشلو قلبي عندك
بدر اتنهد بضيق وطلع على الاوضه وقعد كان قاعد شاب تاني على السرير ده نادر اخوه جوز صباح قال...
مالك مبوز ليه العيل مات بردو
بدر... انا اللي مجننى بيبقى نازل حي وصاحي واول ما بيقطع الحبل السري بيموت ايه المشكله انا مش عارف
نادر... طب اهدا اهدا ان شاء الله افضل حاول وهتظبط
بدر... نحاول ايه اكتر من كده احنا دي سابع مره يحصل فيها نفس الموضوع ده غير امك اللي عماله تقطمنا في الطلعه والدخله مفكراها ناقصه
في اوضه تانيه كانت قاعده ست وربطه دماغها وبتعيط وامها بتقول....
يا بنتى كفايه اللي عاملاه في روحك ده ما ينفعش كده انتى لسه والده وما ينفعش العياط ده
مروه.... ازاى بس انا كل مره تعب حمل وتعب وحم ووجع ولاده ويموتو برضو
امها... اهدي بس ان شاء الله هتتحل
مروه..... انا جربت اولد في المستشفى وفي العياده عند دكتور.. وجبت الممرضه البيت واخر ما ضاقت بيا خالص جبت دايه تولدني في البيت وبردو ما فيش فايده وحماتي بره واقفه وعماله تقنع بدر ان هو يتجوز عليا عشان يخلف انا حاسه انى هيجرالي حاجه اكثر من كده يا ماما هيجرالي حاجه
امها... يا بنت اهدي انا لقيتلك الحل خلاص
مروه... جد اى
امها... لا هقولك بعدين اما تخفى كدا توقفي
مروه... انتى بتضحكي عليا يا ماما عشان اقوم صح
امها.. يا بنت بقولك لقيت الحل بس لازم تقدرى توقفي معايا وتعملى اللي هقولك عليه انما وانتى نايمه كده لا هعرف اقولك ولا هتعرفي تعملي اللى عايزينو انتى خفى بس وسيبيها على الله وعليا
وبعد ايام كانت خفت وواقفه في المطبخ بتحضر الغدا وبدر قال...
يلا بقى يا مروه هاتيلي الاكل انا جعان قوى
مروه جابت الاطباق وقالت... ايوه على طول اهو
امنه... بقول ايه يا بدر
بدر.. خير يا ماما
امنه... انا جبتلك بنت حلوه جميله وما سبقلهاش جواز قبلك ايه رايك
مروه.... فى اى يا حماتي ما هو متجوز لو مش واخده بالك
امنه... انا ما هجوزهوش عشان يتجوز يا حيله امك انا هجوزو عشان يخلف عيل يشيل اسمو وما يبقاش وحداني شعر الابيض خلاص عبى دماغو وعلى راي المثل اولاد الشيبه يتامى يلحقلو عيل قبل ما يكبر
بدر... اقفلى على الموضوع ده يا ماما الله يخليكى سيبيني اكل انا جعان
امنه... براحتك يا ولدي بس تعرف البت يمكن تكون زى مراتك وماتعرفش تجيب ولد انا هجوزك ليلى بنت سماح دي جوزها متوفي من خمس شهور مخلفه حته ولد صحته بومب يهدلك الحيطه ديت
بدر... هعمل بها ايه يا ماما بابنها اللي يهد الحيطه اعمل بيها ايه ما انت لسه قايله ابنها وراها
امنه... العيل صغير ميعرفش حاجه ده يا دوبك خمس سنين بس صحته حلوه
مروه بغيظ... يا سلام يا سى بدر يعني لو ما كانش وراها ابنها كنت اتجوزتها عادي
بدر.. لا اله الا الله مش واكل شيلوا ارتاحو كدا
وسابلهم البيت ومشي
مروه... وبعدين يا حماتى انت مش هتبطلي كل شويه تقوليلو يتجوز هو انا اى اللى فى ايدى ما انت بتشوفي ان انا بحمل والولد بينزل من بطني صاحي
امنه... ايوه يا نن عين خالتك بس اول ما بتقطعو الحبل السري بيموت
مروه.. وانا اعمل ايه في دي الاعمار بيد الله انا احطله روح يعنى ولا اعمل اى
امنه... تتلهي على خيبتك وتسكتي ولعلمك ولا ههدى ولا هيرتحلي بال غير لما اشوف ابنى على كتفه ابنه لو ما كانش منك يبقى من غيرك
صباح... انتى بتقولي ايه يا حماتي لى تجوزى الراجل على مراته هو بيحبها وهي بتحبه ده نصيب خلاص بعدين يعني ايه يعني العيال هم اللي ما خلفوش عيال ماتوا ولا اللي خلفوا عيال اتبسطوا ما اديني انا عندي اربع عيال ما شاء الله الله اكبر في عين الحاسود مطلعين عيني بالك افضل اصوت معاهم ليل ونهار
امنه.... اهو انا بقى عايزاه يبقى عنده اربع عيال زي جوزك هو ناقص ايه يعني على الرجاله عشان يبقى عنده عيل
مروه بدموع... اى الكلام ده يا حماتى وانا اعمل ايه يعني
امنه... تسيبيه يتجوز ويشوف نفسه تخلي عندك دم ما هو مش عايز يزعلك المفروض انتى تقوليله وتشيلى الحرج
صباح. انت عايزه البنت تروح تقول لجوزها اتجوز عليا صعبه صعبه يا حماتي لا ما ينفعش
مروه خدت بعضها وطلعت اوضتها وفضلت تعيط جات امها ودخلت عندها وقالت....
مالك يا بنتى
مروه... حماتي يا ماما كانت جايبه عروسه لبدر وعايزه يتجوز عليا
كريمه... هي حماتك الحيزبونه دى مش عايزه تتلم ولا تهدى ليه
مروه.... انا اعمل ايه بس مش عارفه
كريمه.. انا لقيتهالك يا بنت واصلا جايه عشان اقولك
مروه بسخريه.... امم زي الست اللي لو جبتها تولدني في البيت الاولاد هيعيشو صح
كريمه.... كنا بنجرب.. الست وصايف واصله قوي
مروه... انتى عايزاني انا اروح لدجاله..
كريمه.. امال نفضل قاعدين كده يعني وحاطين ايدينا على خدنا واحنا بنتفرج على عيالك وهم بيروحوا كل ما تجيبيهم واحد ورا الثاني
مروه بصراحه مبقتنعش بيهم انا
كريمه... ما تقتنعيش ليه بعدين مش مهم تتقتنعى المهم نروح
مروه.... متاكده من الموضوع ده
كريمه... الناس اللي دلوني عليها قالوا عليها كلام كتير قوي بيقولوا انها واصله وهتحل مشكلتك كلها
مروه... بس بدر مش هيرضى بالموضوع ده
كريمه... وما يرضاش ليه عشان يروح يتجوز عليكى
مروه... حاضر يا ماما انا هقنعه
كريمه.... انا خدت معاها ميعاد على بكره
مروه... ماما ازاى من غير ما تقوليلي
كريمه... ما انا بقولك اهو يا بنت خدي بالك دى مش فاضيه وبتسافر يعني صدقنا ما لقيناها يلا سلام انا
وباليل كانت مروه مستنيه بدر اللى دخل من باب الاوضه وقال...
عارفه يا بنت فى عندنا في الشركه شغله لو نجحت ان شاء الله هتجيب فلوس حلوه قوى
مروه... ان شاء الله تتم
بدر... ايه مالك مبوزه ليه
مروه... صحبت ماما دلتها على واحده ست واصله قوي من الجماعه بتوع البخت هتشوفلي ليه العيال بتموت لما بنقص الحبل السري
بدر بضحك... ودي بتضرب بالودع ولا بتشوف المستخبي
مروه... حاجه زي كده
بدر.... بلاش تروحى الحاجات دي اساسا مش موجوده ما فيش اثر للكلام ده تمام والناس دي كلها نصابه بيضحكوا على الناس وبيدوسوا على الجرح اكثر واكثر علشان الفلوس اذا الدكاتره ما عرفوش دي هتعرف بعدين هي ملهاش غير انه نصيبنا كده يعني
مروه.... انت مامتك عايزه تجوزك
بدر... انا مش هتجوز غيرك العيال مش بيموتو في بطنك اساسا وهو بيتولد عايش وبينزل الدنيا عايش ده قدره ربنا اخذ روحه علشان هو ما ارادش ان انا يكون معايا اولاد اذا انتى او غيرك برده هيموتوا ماما ست كبيره ليها وجهه نظر غيري وبعدين انا مش هخليكى تروحي للست الهبله دي تعمل فيكى حاجه تروح تموتك ولا تنيل لا
مروه... خايف عليا
بدر.... ما انت لو حصلتلك حاجه انا هلبسك
مروه.. بدر بس بقى دى ست واصله جدا يعني هتحاول تساعدنا علشان خاطرى والنبي خليني اروح والله ماما بتقول ان الست دي وصله قوي
بدر... ولا وصله ولا مشترك ما فيش روحان خلص الكلام نامي بقى ولا قومي جيبيلي اكل ولا اعملي